Алматы
Жанарынан мейірімнің самалы ұшқан,
сəруар жүзі сəбидей ана құшқан,
осы жерден өріс ап басталады
менің байтақ Отаным – Қазақстан.
Көгершіндер көгінде таңнан өріп,
Алатаудан жатқандай арман өніп,
қырандардың қастерлі тұғырындай
мынау менің Алматым алма көрік!
Еңбегіммен өркендеп ырыс, бағым,
салтанатты саптарда ту ұстадым.
Мұңымыз бен жырымыз тоғыстырған
кел, төрге шық, тілі өзге туысқаным!
Адамзатта еркіндік – талайғы арман,
сəуле шашып сəуірлер қарайды алдан.
Қиялымда – ертегі ертеңдерім
үмітімнің нұрымен арайланған.
Жаншылса да, жанынан жыр арылмай,
сүйсінердей дос, дұшпан тұрағым бай.
Көңілім – сал Сарыарқа, Алатауым
қайсарлықтың, елдіктің шынарындай!
«Медеу» – анау жарқылдап жатқан күліп,
намыс пенен ерлікке баптар, мұны ұқ!
Қырандарын тұрғандай жеңістерге
өз қолымен Медеу қарт аттандырып.
Ару қалам, Алматым, таң – жанары,
ұрпақтардың арманын жалғар əлі.
Ана қыран апай төс
Алатаудың
кеудесінен тұр көкке самғағалы!