Ақын өлеңдері жинағы ✍️

Мен сенсіз өмірімді
елестете алмаймын мүлде, мүлде!
Екеумізде таң мен түс, түн де бірге.
Жүрек сырын шертуді басқа адаммен
өңім түгілі, ойлауға жасқанам мен!
Бұл өмірде
жалғыз жүру құлазып – жаза жанға,
аузын ашып тұрғандай ажал алда.
Шақырмайды əуендер тымық таңға –
сенсіз жерде əн, бақыт, қызық бар ма!
Махаббатым –
мөлдір əуен, сұлу саз көктемдерім,
көктемдерім – өзіңнің өбкен демің!
Тірлік əні – нұры боп көрінсе Күн,
жүрегімнің жалқы əні – өзің сенің!
Мен мынау дүниенің
келем кешіп өзіңмен асуларын,
асулардан қиналсаң, қасыңдамын.
Жүрегінен жырлайды ғашық жаным
махаббаттың мəуелі жасыл бағын!