Ақын өлеңдері жинағы ✍️

Қырандарда қыран бар самғайтұғын,
Самғайтұғын биікке, талмайтұғын.
Оларда да бар шығар әлжуаздар
Тышқан аулап, өзегін жалғайтұғын.
Оларда да бар шығар шеңгелдерін
Арлан түгіл көжекке салмайтұғын.
(Т. ҚАЖЫБАЕВ. Жол басы 46-бет)
Ақында да ақын бар самғайтұғын,
Самғайтұғын биікке, талмайтұғын.
Балдай шырын тамаша өлеңдерін
Тана көзді қыздарға арнайтұғын.
Ақында да ақын бар алмай тыным,
Өлең іздеп, ой-қырды шарлайтұғын.
Орайына оңтайлы ұйқас тапса,
Қыр соңынан өлгенше қалмайтұғын.
Ақында да ақын бар алдайтұғын,
Айтқанына еш адам нанбайтұғын.
Тышқан аулап күнелткен жапалақтай,
Алты қырдан әрі асып бармайтұғын.