Ақын өлеңдері жинағы ✍️

Ескi таныс, мен саған өкпелiмiн,
кеудеңнен ғайыпқа ұшып кеткелi мұң.
Жалған неге сөйлейсiң, жалған күлiп,
кебiн киiп алғандай «көк перiнiң»?!.
Әзiлiң де аспаннан түскендейiн,
(майланған ба, апыр-ай, iскен бе ойың?!);
жаттап алған сөзiңдi әлдекiмнен
ертеңгiсiн, айтасың түстен кейiн.
Бәрi саған белгiлi, бәрi қанық,
жатпасаң да түсiнiп бәрiн анық;
билiк айтып тұқыртқың кеп тұрады,
жас жасыса, алдыңда кәрi налып.
Езiп-жаншып кетердей бәрiн, бәрiн,
өзiңдi де өзгенi «жарымдадың».
«Сұрауы бар судың да», ескi таныс,
неге мұнша, апыр-ай, арындадың?!
ақпан, 1982 жыл.