Ақын өлеңдері жинағы ✍️

Наурыз келді күлім қағып,
Тал-теректер бүрін жарып.
Бірін-бірі құттықтайды,
Қыз-жігіттер гүлін алып.
Наурыз келді пейілденіп,
Жаңа күнге бейімделіп.
Бірін-бірі құттықтайды,
Барлық адам мейірленіп.
Наурыз келді несібелі,
Мәртебеңді өсіреді.
Өкпелескен жандар болса,
Бірін-бірі кешіреді.
Наурыз түріп елес түнді,
Күн мен түнді теңестірді.
Тіршілікке қан жүгіртті,
Көкке орап белес-қырды.
Қарашы тау құздарына,
Жібіп жатыр мұздары да.
Жолын берді жылылыққа,
Кетіп қыстың ызғары да.
Наурыз ашты есігіңді,
Тербеп бақыт бесігіңді.
Ей, адамдар, бір-біріңе
Болыңыздар кешірімді.
Наурыз келді, қарсы алыңдар,
Тамашалап, тамсаныңдар.
Жаңа жылда жарқын жүзбен
Ақ жарылып, ән салыңдар.