Ақын өлеңдері жинағы ✍️

Туған күн құтты болсын, Айнат қызым,
Туғаннан қажырлысың, айбаттысың.
Өмірдің қиындығын көп көрсең де,
Қайыспас қарағайдай қайраттысың.
Біреумен бақталасып жарыспадың,
Сыйлады қатар-құрбы, таныстарың.
Айрықша алға түсіп кетпесең де,
Мықтымын дегендерден қалыспадың.
Сыйлаған Жаратушы өткірлікті,
Басыңда білімің де жеткілікті.
Атқарып ерлікпенен ердің ісін,
Бойыңнан қуа білдің көп күдікті.
Аналық шапағатты аямадың,
Екі қыз – екі гүлді аяладың.
Екеуі аман болсын, адам болсын,
Түбінде олар сенің сая бағың.
Туған күн құты болсын, Айнат қызым,
Бойыңнан сарқылмасын қайрат-күшің.
Қызықты кең дүние құшағында
Көктемдей құлпыра бер жайнап жүзің!