Егінімді ерте қамдап,
Ерте екпей,
Тәтті тағам татқаным жоқ тер төкпей.
Жасандылық жасамадым жалғанда,
Еркектермен сөйлесе алдым еркектей.
Істің аңдап оңы менен терісін,
Терісіне бергенім жоқ келісім.
Бірді жақын,
Бірді алыс демедім,
Жан біткеннің бәрі бірдей мен үшін.
Тайып кеткен тұстарымда өкіндім,
Өкіндім де,
Құламасқа бекіндім.
Жел өтінде қасарысып, қарысып,
Шыңға шыққан шынардайын жетілдім.