Ақын өлеңдері жинағы ✍️

Жүре бермей өмірдің көшіменен,
Есім кетіп, сүйді екем несіне мен?
Жұлдыздар да ендігі жұбатпайды,
...Ай жатыр шалқасынан есінеген.
Ауламда күбірлейді құлаған нұр,
Құлаған нұр, сезім бе жылаған бұл?
Түн кейде жұбататын...
Ол да бүгін
Меңірейіп неліктен тына қалды?..
Жаным-тұлпар өзіңе арқандалды,
Жалғыздық-ай жүректі талқан қылды!
Ұшқын шашып төменге, жұбататын
Шылымым да таусылды қалтамдағы...
Маған жалған туғаннан тосын еді,
Болмысым неге нәзік осы менің?..
Мені ылғи жұбататын әзіл айтып,
Ұйықтап жатыр үйінде досым менің...
Сезім мен шарасыздық айқайласып
Тұрған кезде қалайша жай табасың?..
Оятайын мен сені тәтті ұйқыңнан,
«Сүйем» деген сөзіңді қайталашы...