МАХАББАТ ПЕРІШТЕСІ
Менің сұрғылт ойларымның ішінде
Жылап отыр жараланған періште.
Күдірейген еркек сайтан түсімде
Айтқанымды дауыстайды терістеп.
Бір хабарды жеткізуге келгендей,
Жылап отыр, о, неліктен, аппақ рух?..
Жаһандағы жалғыз досым өлген бе,
Қайдан келді қалқып ұшып батпырауық?..
Рухы келді мүлде басқа аспаннан,
Әлденеден қалтырайды жер бүгін.
Сорлы Ібіліс бұ дүниеге тасталған
Орындатпақ болғаны ма жарлығын?..
Мүмкін біреу көрді ме екен Құдайды,
Содан бері ол бейшара мазасыз?..
Ол бейбақтан ұрпақ енді тумайды,
Бірақ мәңгі өмір сүрер қазасыз?..
...Әлде, биыл көктем келмей қояр ма,
Қыстан кейін қайта айналып келер күз?..
Әлде, біреу лашығында оянған
Қалған шығар жалғыз өзі, әлемсіз?..
Ей, періште!
Ақ қанатты жолдасым,
Жыламашы, жыламашы, білемін...
Бір сезімді жоқтап келген шығарсың,
Ал мен саған сұрақ қоя беремін...
Сезімі жоқ құлазып тұр жүрегім,
Еһ, періштем, махаббат қой – тілегің...