Ақын өлеңдері жинағы ✍️

Әлем Күнге теріс қарап жатып қалды...
Ұйықта, жаным.
Жүрегімде бір өлең қатып қалды –
Жаттамадым.
Неліктен өмір бүгін тоқтай қалды,
Білмей қалдым.
Сен ғана мені сақтай алдың,
Өлмей қалдым.
Мына жазды Тәңір, білем,
Күз етерін.
Сен тәтті түстер көрші,
Күзетемін.
Жаңбыр бүгін жаумай қапты,
Салмай ізін...
Періштеден аумай қапты
Сенің жүзің.
Мекенің – түс әлемі,
Қандай күйің?!
Бір жерде кісі өледі,
Сондай қиын.
Мен оған дұға қылдым,
Жалындата.
Мына түн – шұға сынды,
Қалың мата.
 Өзге әлем құстарындай
Болсақ, жаным...
Қанаттың ұштарындай
Саусақтарың...
Шашырап шоқ секілді,
Жасыл шерім...
Қап-қара от секілді
Шашың сенің.
Көктемнің нала хаты...
Жазғытұрым...
Мені өлтіріп бара жатыр
Нәзіктігің.
Сен үшін ыстық түнді
Мұз етемін.
Сен тәтті түстер көрші,
Күзетемін...