Ақын өлеңдері жинағы ✍️

Маған, мүмкін, бару керек балшыға,
Үрейімнің білу үшін отанын.
Бар жынымды жығып берсін қамшыға,
Мен несіне өз-өзімнен қорқамын?!.
Маған, мүмкін, бару керек балгерге,
Айтып енді өлтірсін деп шынымен.
Өз-өзімнен қашып жүрмей әр жерге,
Мұң тамырын суырайын түбімен.
Маған, мүмкін, бару керек емшіге,
Бұл дертімді жазып берсін шөбімен.
Мен сенбеймін өлең деген елшіге,
Ойларымнан өзім шошып, шегінем.
Маған, мүмкін, бару керек анама,
Алақанын сағындым-ау, білемін.
Түсіретін сол адам ба сабама,
Неге тоқтап, соқпай қалдың, жүрегім?!