Ақын өлеңдері жинағы ✍️

Шытырман түстер... ұлыған иттер дауысы
Қинайды мені, көз іле қалсам түн іші.
Ауаға тажал сурет сала береді
Сүп-сүйрік саусақ-қауырсын.
Шытырман түстер:
құтырған иттер күлкісі,
қос басты аттар,
төрт көзді қырдың түлкісі...
Сапарға шықсам, қолыма ұстап басымды,
Еңкілдеп жылап, қабір қазады бір кісі...
Шытырман түстер...
Бітпейтін зарлы жаңғырық...
Жүреді біреу аң қуып.
Құтырған қасқыр қаңғырып,
Жүреді маңды лаң қылып.
Еріккен біреу ішімнен
ұлиды-ай келіп!..
Әңгүдік...
Шытырман түстер...
Аядай ғана бөлмемде менің дөңгелеп
Лаулайды Күнім... әңгелек...
Оятшы мені, телефон...
Өртеніп барам!..
Жан керек!..