Балаларға арналған тақпақтар ✍️

Тақтайменен қиықтап,
Жасалған бір тұйықтап.
Үйшігінде көк күшік,
Жатыр еді ұйықтап.
Шаңқай түсте ысыған,
Жылқы өткенде тұсынан.
Түре келді елеңдеп,
Мойнын қасып қышыған.
Көрді асты құйылған,
«Маған ғана бұйырған»,
 Дегендей-ақ
Көк күшік
Қызғанды өткен сиырдан.
Бұзау өтті.
Шəу етті.
Қозы өтті,
Шəу етті.
Ертіп алып ботасын,
Түйе деген дəу өтті.
Үйрек өтті,
Ыр-р етті,
Ызаланып гүр етті.
Жақын қонған торғайлар,
Шошынғаннан пыр етті.
Сөйтіп жатқан кезінде,
Ұйқы келді көзіне ...
Оянған соң əлгі астан,
Түк қалмапты өзіне.