Бізде шолжаң бала бар,
Тілінде бір «шала» бар.
Оның айтқан сөздерін
Түсінбейді балалар.
«Р» дегенді «ыл» дейді,
«Жыр» дегенді, «жыл» дейді.
Шіркін сабаз, бүлк етпей,
«Бір» дегенді «біл» дейді.
«Тайқарбайды» – «Тайқалбай», –
Дейді мүлдем айта алмай.
Осылайша талай сөз
Бұзылады байқалмай.
Үлкен-ақ бол сен мейлі,
«Сіз» демейді, «сен» дейді.
Сәрә, оңай «З»-ға да
Оның тілі келмейді.
Еркелікті тастаса,
Аңдап сөйлей бастаса,
Айтпас еді ол бала
«Р» дегенді басқаша.