Балаларға арналған тақпақтар ✍️

- Сенің туған күнің, - деп,
Беске толдың бүгін, - деп.
Менің ағам Нұрғалы,
«Ойыншық-хоккей» сыйлады.
- Біліп алмай болмайды,
Бұны былай ойнайды, -
Деп дәлдеп кеп қақпаны,
Ал шайбаны атпады.
Ағай тағы көздеді,
Ал серігі төзбеді.
Ол кісі айтты:
- Егер сен
Торға шайба түсірсең.
Сонда қалай шыдар жан,
Шығасың ғой құмардан.
Нысанаға тимеді,
Ашулы ағай бүй деді:
- Сіз азырақ шыдағын!
Қазір қайта ұрамын.

2
Бұған анау көнбеді,
Өз кезегін бермеді.
- Қара да тұр, мен енді,
Көрсетейін өнерді.
Ұрып еді шайбаны,
Қақпаға доп бармады.
- Тағы да ойнап көрейік,
Жеңіліп не жеңейік.
Жеңбек ойы қалайда,
Білек түрді ағай да.
Торға шайба салмақшы,
Ойын қайта жалғасты...
Ештеңені ұқпадым,
Ойыннан мен сырт қалдым.
Бірі ұтылып, бірі ұтты,
Мені олар ұмытты.
Айтыңдаршы шындықты,
Кімге әкелген сыйлықты?