Күнде қаза...
Күнде қаза, күнде жайсыз хабарлар,
Өміріміз не боп кетті, адамдар?
Жақсылықпен атар таң бар, бұл сәтті
Жағымсыз бір түс деп қана санаңдар.
⠀
Қақтығыссыз болды майдан алаңы,
Аз халқымды вирус жалмап барады.
Аза тұту күні бүгін - қазақтың
Тарихында таңба болып қалады.
⠀
Айтамыз деп зарын кімге, ашына,
Қайғы жұтып қартамысы, жасы да.
Қорқынышпен ауыр азап арқалап,
Қаралы күн туды елімнің басына.
⠀
Әлі тажал қаһарынан танбады,
Аждаһадай кімге ауыз салмады?
Айырылдық асылдардан қаншама,
Аман болса екен енді қалғаны.
⠀
Бәрімізге ортақ - қайғы, ортақ - мұң,
Жігеріңді жинап, халқым, жол тапқын.
Қайтқандардың пейіш болсын мекені,
Әр пенденің қайғысына ортақпын.
⠀
Нәубет, соғыс....бұдан қиын күн де өткен,
Заманымды қайтем жөнсіз тілдеп мен?
Бір Алланың қалауымен, тезірек
Кұтылайық аты жаман індеттен!!!
