Ақын өлеңдері жинағы ✍️

Жолың болсын жарқыным...
Бізді ұдайы,
Күреңітіп күтеді күз мұңайып.
Диуананың күйзелдім күйін кешіп,
Теңеу таппай ғаламнан сізге лайық.
Бағы күйкі тірліктен қажыған сәт,
Сен ояттың...
Тәп-тәтті нәзік ән сап.
Жыл құстарын асыға күттім биыл,
Өмір менен жүректің жазын аңсап.
Айтар шағым білсем де бұл емесін,
Жүрегім бар...
Мүмкін бе жүдемесім?!
Сәл мұңайған...
Гүлі бар құшағында,
Өзіңді іздеп вокзалда жүр елесім.
Сағыныштың соқтырған бал жұпарын,
Лебізіңмен емделіп нәр жұтамын.
Жо-жоқ, қалқа...
Сенімен кеттім бірге,
Қимай қарап шарасыз қалды тәнім!...