8-наурыз
Бүгін мейрам,
Ой тербеген санамды.
Әй бауырым,
Құттықташы анаңды.
Мен де бүгін шабыттанып жыр жазып,
Жеңгелер мен құттықтайын анамды.
Ана жүрек,
Баласына алаңды.
Бала жүрек,
Қадірлеші анаңды.
Бір қолымен төл бесікті тербеткен,
Бір қолымен әлпештеген ғаламды.
Жырымменен өлеңім бар, саз өнер.
Немере мен шөбересі – Әже – дер.
Немересін арқалап бір бағатын,
Төл мерекең құтты болсын әжелер.
Тірегі де өздеріңсің ғаламның.
Кіндігіңнен жаралғанмын, балаңмың.
Келіндер де, жеңгелер де жасасын,
Жасын берсін,
Жолын берсін анамның.
Бауыр десе, сеңдей соққан көңілім.
Өздеріңмен ұзарады өмірім.
Әпкелер мен қарындастың мейрамы,
Іні-ағалар құттықтайтын жөнің бұл.
Құдаша мен балдыздардың күндері.
Жарқын-жарқын шығып жатыр үндері.
Жездесінің құлағынан тартады,
Құдаша да өзгеше ма, күндегі?!
Алға тартып, дәлелі мен дәйегін.
Ұл-қызыңды өсіретін әйелің.
Жігіттер де ұмытып бір кетпесін,
Ұрпағының аналарын, әйелін.
Жыр арнаған демеңіздер мен екем.
Әйел жұрты кетпесінші берекең.
Бір күн емес, әр күн сайын тойлайық,
Құтты болсын,
Құтты болсын мерекең.