Ақын өлеңдері жинағы ✍️

Жетердей-ақ,
Жүруге күшің анық,
Жер тепкілеп,
Мамаңның құрттың да әлін,
Қалтиып,
Тұрсың жерге түсіп алып,
Айқайыңа қаратып жұрттың бәрін...
Көп дырдуды бір сенің даусың басып,
Бірі күлсе,
Изейді бірі басын.
Әрбіреуге бір қарап, аузыңды ашып,
Бері тартсам,
Кейінге бұрыласың...
Қызық-ау қылығың да,
Мінезің де,
Қайсарлық танытуға жарағаның.
Билігі дүниенің бір өзіңде,
Көнбейсің,
Болмаса егер қалағаның...
Қамқорлықтың бүгінгі түрі мынау,
Шаршатты да,
Еріксіз жалбарындым.
Шыныменен бұл сенің, құлыным-ау,
Белгісі ме адам боп қалғаныңның....