Ақын өлеңдері жинағы ✍️

«Кеңсай» мен Кент арасы таяқ тастам,
Алдыңнан аруақ шығар, аяқ бассаң.
Асырып айла-амалын Ажал шіркін
Бір күні ап кете ме оятпастан…
«Кеңсай» мен Кент арасы көк пен жердей,
Көк пен жер көкжиекпен шектелгендей.
Арада Өмір деген өр өзен бар
Жататын жаз, көктемде өткел бермей.
«Кеңсай» мен Кент арасы бір-ақ адым,
Сен оның жөн-жосығын сұрамағын.
Тағы да аяқталды ай, аптаңыз,
Тағы да таяп қалды Жұмаға күн…
Келмейді «Кеңсайлықтар» қала жаққа,
Қимайды жарық күнді жаманатқа.
Жұп жазбай жұмағында жатыр олар
Жұмбағын тастап қойып жамағатқа.
«Кеңсай» мен Кент арасы таяқ тастам,
Алдыңнан аруақ шығар, аяқ бассаң.
Сайдан да, сағымнан да сая таппас
Саннан да, санаттан да саяқ қашқан.
«Кеңсай» мен Кент арасы таяқ тастам…