Баталар жинағы ✍️

Берейін, міне, бата,
Дарысын Қыдыр Ата.
Қыдыр қияласын,
Періште ұяласын.
Бақ берсін,
Жаратқан ием бас берсін,
Өміріңе ұзақ жас берсін!
Кетпес ырыс, кең пейіл берсін!..
Жарылқағанға жалғас қылсын,
Қарғағаннан қалас қылсын!
Бейнетін ақ қылсын,
Мұратын асыл қылсын!
Қаба жауған қардан сақтасын!
Қаптай шапқан жаудан сақтасын!
Ауызы қанды бөріден сақтасын!
Қолы қанды ұрыдан сақтасын!
Осы үйге жамандық ойлаған адам
Бұл дүниеде береке таппасын!