Ақын өлеңдері жинағы ✍️

Жасымнан кешкен,
Басымнан көшкен, дəуренім,
Көгілдір кештен
Көкейді тескен сəуле едің.
Өттің де кеттің…
Өңінде көктің саң қалды.
Қайтейін мынау
Қадірсіз, құнсыз жалғанды?!
Жанары сүттей,
Жарығы жіптей Ай қайда?
Өңірді тұман,
Көңілді күмəн жайлай ма?..
Жаным дір етті,
Жарым түн өтті… Таң ұзақ.
Көгімде-сағым,
Лебімде-жалын, аңызақ.
Халімді хатқа,
Жайымды жатқа білдірмей,
Жазмышқа көніп,
Озмышқа сеніп жүрмін ғой.
Жасым ба аққан? –
Аспани жақтан сырғыды Ай.
Көгенде – көзім,
Медет бер өзің, бір Құдай…