Ақын өлеңдері жинағы ✍️

Бір жөнім қалмасын деп танытпаған
Бар ынта пейіліңді салып маған,
Шындаған құрыш құйып ұстадайын
Ұстазым үйретуден жалықпаған.
Мүдірген жерім болса дәл ұқпаған,
Андаусыз кетсе кейде.шалыс қадам,
Секілді мейірімді қамқор анам
Кейісті көрсетпеген қалып маған.
Барлаған өмір өрін шарықтаған
Болжаған болашағымды анықтаған
Шағында әр биіктен күле қарап
Қаншама қиялында қалықтағам.
Қыранның қия құзға қасқаратын
Бекіттің өзің баулып жас қанатын
Қарадың үміт толы назарыңмен
Ұшқанда қомдап құсын қос қанатын.
Сілтедің үнемі тек өмір өрін
Соныңмен мекендедің жүрек төрін.
Әрқашан ілгеріге жетеледі
Ақниет қосқан игі тілектерің.