Ақын өлеңдері жинағы ✍️

Таң әлі атпаған,
Алаулар жағылмаған.
Дүние құралған:
Тұмандардан,
Сағымдардан.
Доптар жарылмаған,
Оқтар атылмаған.
Дүние құралған:
Молекулалардан,
Атомдардан.
Галактика балқып жатқан,
Қара жұлдыздар құшағында.
Планета малтып жатқан
Мұз мұхиттың құрсауында.
Дүниеге сөздер әлі айтылмаған,
Кітаптар жазылмаған,
Арықтар тартылмаған,
Каналдар қазылмаған.
Жер жатқан ұлтарақтай,
Ал, аспан жазылмаған бір парақтай.
Қанша заман өтті
Адам күн тапқанша.
Маңдай терін құрғатқанша.
Адам қанша күн кешті,
Аспанға жол тапқанша,
Жұлдыздардан жөн сұрап,
Арманын айға орнатқанша
Қанша замандар өтті...