Ақын өлеңдері жинағы ✍️

(Шетелге барған бір жолдастың
аузынан)
Нью-Йоркті болар емес түсініп,
Темекінің түтінінен іші бұлт.
Бір бала жүр кешке жақын жаутаңдап,
Алыңыз деп әркімге гүл ұсынып.
— Бұл гүлімде әшекейлі өрнек көп,
Жатыр мұнда құстар сайрап, жер көктеп
Алыңызшы, арзан беріп кетемін,—
Дейді бала ұшып-қонып елбектеп.
Алданышпен өтіп жатқан күні құр,
Осындағы көп баланың бірі бұл.
Қолындагы жасанды гүл болмаса,
Өмірінде көрмепті ол тірі гүл.