Ақын өлеңдері жинағы ✍️

Қырдан ойға шұбырып,
Құлады қой маңырап.
Қарсы шықты жүгіріп,
Жас қозылар жамырап.
Тұманданды сұр дала,
Тұяқтардан шаң ұшып.
Қозылармен бір бала
Кете барды жарысып.
Тілінсе де табаны,
Тікенек пен шеңгеден.
Ақ тиындай ағады,
Орғып ордан көлденең.
Көруге тым қашықтан,
Дағдыланған көзі ұдай.
Енесіне асыққан
Ол-дағы бір қозыдай.
Қалыспайтын дүбірден
Албырт бала кезінде.
Болар солай жүгірген
Шопан ата өзі де.