Ақын өлеңдері жинағы ✍️

Керілген көк жібектей көк әлемі,
Тағы да келді көктем — күн әдемі.
Сен маған бұл көктемде кездеспедің,
Айтатын көңілімде сыр бар еді.
Ұлыңның көп ойладың жалғыздығын,
Бірақ та емес ұлың жалғыз бүгін.
Бақытты достарының ортасында
Келеді көріп өмір бар қызығын.
Көз жұмдың былтырғы өткен апрельде,
Табытың түсірілді тақыр жерге.
Жастықтың жалынымен бір жалғасып,
Ұзарған кәрі өмірің жатыр менде.
1953