Ақын өлеңдері жинағы ✍️

Саламат жатырсың ба, жолдас Абат,
Салынған түрме ішінде неше қабат.
Жүйрікке жүзден озған сейістер де,
Суытып, сылап-сипап жабу жабады.
Келтіріп күйіне анық алғаннан соң,
Бәйгіге, таң айырта, тағы шабады.
Ақ көңіл, ашық жүзді әр қалайда,
Сыпайы ең сияқтанған сөзі набат.
Сондықтан тілектеспіз "болғай да, - деп,
Бостандай бұлбұл сайрар салқын сабат".
Кемді күн кемшілікті көргенмен ер,
Кендіктің кешікпей-ақ кенін табады.