Кәрімге айтқаны
Сөз тыңда салып құлақ інім Кәрім,
Бір туған бүтін жүктік едің нарым.
Шау тартқан сонда - дағы сықылың бар,
Жойылып ертелі-кеш иіскер дәрің.
Денің сау, дерт, сырқаудан болып тұрса,
Болмасын бұл туралы көңілің жарым.
"Ер - дарақ, бала - бұтақ" деген нақыл,
Бұрынғы қариялардан қалған сарын.
"Кейіні кеніш реніштің болады" деп,
Айтады және - дағы біздей кәрің.
Ойыңа осыларды етіп медеу,
Қуала уайымның іштен бәрін.
Ұл-қызды ұзақ жасты тағы туар,
Аман-сау болып тұрса алған жарың.
Жар - достың жабыққанда айтқан сөзі,
Адамның әр қалайда ашар пәрін.
Осындай бірер аңыз айттым үгіт,
Келін де тарқатсын деп тартқан зарын.
Соққан жел жазғытұрғы жоқ қылмай ма,
Тоқсанның түйе бойы жауған қарын.
Сондай-ақ сүйініштен соғып шамал,
Келінім, көп кешікпей кірер әрің.
Тілектес Ғайып ана болып жатыр,
Қалайда қатар-құрбы, ағаларың.
"Қол деген — көп дұғасы" қате емес,
Орасан ойдағыдай өнер тарың.
Ер сөзін енді сынап көрейік деп,
Секілді сақта таза бойтұмарың.
1937