Ақын өлеңдері жинағы ✍️

Еркетай қоңыр жел,
Еркеме соқсаң егерде,
Күрсінгендей сыбырла,
— Кімдікі десе, — үндеме...
Ойнақы тұнық бұлақша,
Жолықса еркем егерде,
Бетіне жастай сорғала,
— Кімдікі десе, — үндеме...
Жайдары шуақ күнікей,
Еркеме түссең егерде,
Күйдіре қарап себезде,
— Кімдікі десе, — үндеме...
Қараңғы жым-жырт тоғайшық,
Қойныңа еркем кіргенде,
Бұтақпен төсін қытықта,
— Кімдікі десе, — үндеме...

Ілияс Фатимаға, 1927 жыл