Ақын өлеңдері жинағы ✍️

Тегіс жерде жығылып,
Алып-ұшып жүремін.
Ауызыма тығылып,
Алқынады жүрегім.
Шын Әділет хақында
Сөйлеу керек қорғанбай.
Өмір үшін лапылдап
Өртенемін ормандай.
Ақ кірмеген шашына
Мұны қайдан ұғады!
Ә дегенше Басыма
Қаным ойнап шығады.
Тасып көңіл өзені,
Ұмытса қарт құдайды,
Қалайша адам төзеді,
Қалайша адам шыдайды?!
Жыр елінің баласы
Жану керек әманда.
Қалай салқын боласың
Жанып тұрған заманда?!