Ақын өлеңдері жинағы ✍️

Инженер, дос сыйлаған
Жез аралас шақпақ тас.
Серіктейсің сен маған
Жанымнан от жоқтатпас.
Жалғыз түйір қалпыңмен
Болдың неткен аяулы-ақ!
Туған жердің салты мен
Қасиетін баяндап.
Жалт-жұлт етіп қарайсың
Талай сурет көзге әкеп!
Сыбырлайсың талай сыр
Көңілімді қозғар — көп.
Қара қазан Қарсақпай,
Жезқазғанның көлемін —
Сенің осы кішкентай
Кескініңнен көремін.
Абзал достар еңбегі,
Әзілі мен күлкісі,
Өздері өскен жердегі
Жарқын жолы, түр-түсі, —
Бәрі кезге түсетін
Асыл сәуле шыныдай,
Туған жердің бір шөкім
Сүп-сүйкімді сынығы-ай!
Инженер дос сыйлаған
Жез бунақты шақпақ тас,
Серіктейсің сен маған
Серілерді жоқтатпас!