Ақын өлеңдері жинағы ✍️

Дүниеге келген ғұмырдың
Алғашқы ана сүтін емгені де,
Еңбектеп ұлы өмірге енгені де,
Тәй-тайлап, қаз-қаз басып көргені де,
Тұңғыш эксперимент!
Балалықтың тәтті дәмін татқаны да,
Ағындап өмірінің аққаны да,
Жоғалтып, тапқаны да,
Тұңғыш эксперимент!
Адамның арман асылы да,
Ғажайып құпия ғашығы да,
Көңілдің көк-жасылы да,
Тұңғыш эксперимент!
Өмірдің құпия қойнауына,
Адамның терең бойлауы да,
Ел, халқын ойлауы да,
Тұңғыш эксперимент!
Армандай туар таңның атары да,
Ең сәулелі ғылымның шапағы да,
Ғаламат ғарыштарға сапары да,
Тұңғыш эксперимент!
Азамат өмірдің марқаюы да,
Марқайып барып қартаюы да,
Төсек тартып жантаюы да,
Тұңғыш эксперимент!
Көтере алар қазаны да,
Баянды өмір базары да,
Адам үшін ажалы да —
Тұңғыш эксперимент!