Ақын өлеңдері жинағы ✍️

Терең-терең сайлардан

Біз гүл терген кездерде,

Қос жанарым байланған

Терең-терең көздерге.

Терең-терең көлдерге

Сен су ала барғанда,

Бар еді бір шөл менде,

Айналып ең арманға.

Қызыл-жасыл сол күннің

Қызығына тойдым ба?!

Тұнығына шомылдым

Терең-терең ойдың да.

Өмір атты ағыста

Жырақтадың сен де елден.

Кеттім мен де алысқа

Белес-белес белдермен.

Еміс-еміс елеске

Әлі жаным құлшынып,

Аламын мен сені еске

Терең-терең күрсініп...