Ақын өлеңдері жинағы ✍️

Тіршілік қой, таусылған ба дертіміз,

Бір жігітке ғашық болды екі қыз.

Бірі – өңсіз,

Бірі – сұлу, сымбатты,

Жүрді екеуі бөлісе алмай бір бақты.

Өңсізінің жаны таза, пәк адам,

Көріктінің бетін әркім жалаған...

Өңсіздеуі мінезді, сөз ұғатын,

Көріктісі ұшып-қонып тұратын.

Өңсіздеуі жылтырақсыз, ақылды,

Көріктісі жылтырақты, жарқылды...

Екеуінің ортасында бір жігіт,

Екі қызда екі түрлі жүрді үміт:

Өңсіздеуі шын сүйгенін қалайды,

Көріктісі қаражатын санайды...

Бірі – өңсіз,

Бірі – сұлу, сымбатты,

Жүрді екі қыз бөлісе алмай бір бақты.

Өңсізіне жігіт онша қарамай,

Сұлу қызға аңқылдайды баладай.

«Сүйген сүлу!» – деп жүрегім тіл қатты,

...Айыру қиын арзан менен қымбатты...