Ақын өлеңдері жинағы ✍️

Ашылмай тұр бүгін де күн қабағы,

Домбырамның ішегін мұң қағады.

Құлағымда – күлкісі сыйқырлаған,

Көз алдымда – билеген сырғалары.

Әр айтқаны әсерлі – ойымда әлі,

Жанарына жанарым тойынбады.

«Сүйемін» деп жүрегім лүпілдеді,

Ақылым да осыны мойындады.

Қас қағым сәт, бақыт боп сәтті өтіп ең,

Қалам ойға,

Мен енді қатты өкінем.

Сүйіп неге алмадым-ағасынып,

Айналайын, - деп сонда ақ бетінен?!

Ақкөңілі алғаусыз аппақ екен,

Маңайында болдым деп мақтан етем.

Құйған шайын құныға іше бердім,

Құйған шайы армандай тәтті-ақ екен.

Махаббатта байқадым сел, күш барын,

Сен жүрген жер болар-ау енді ұшпағым.

Жалғап жүрді бір кесе арамызды,

Мен де ұстадым, кесені сен де ұстадың.

Көзіңдегі сөздерді оқып әбден,

Шаттандым-ау шілтерді тоқып әннен.

Бір кесе емес, бірнеше жалғап себеп,

Мәңгі-бақи осылай отырар ма ем?!