Ақын өлеңдері жинағы ✍️

Көктем күліп көзіңнің қиығында,

Қолаң шашың қол бұлғап иығыңда,

Бұлттан шыққан аппақ ай секілденіп,

Жолықтың-ау қырықтың қиырында...

Ақ қайыңдай ну орман ішіндегі,

Ақ періште секілді түсімдегі,

Кездестің де әкеттің аспандатып,

Қиял шіркін жерге бір түсірмеді.

Кәусар бұлақ – тап-таза күлкің қандай,

Ыдырады көңілде бұлтым қалмай.

Құлпырғандай дүние лебізіңнен,

Қарсы алдымда күн күліп, нұр тұрғандай.

Өзің болып көріндің көңіл кілтім,

Басқа күндер – тірлік қой...

Өмір – бұл күн!

Жүр екен-ау,

Жүр екен өлмей тірі

Уақыт-сұм жоғалтқан менің күлкім!

Жан-күйімді дәл қазір кім ұғынған,

Көз ала алмай қалдым-ау қылығыңнан.

Тағы да бұл түсім бе,

Өңім бе әлде,

Сипайыншы, қалқам-ай, бұрымыңнан!