Ақын өлеңдері жинағы ✍️

Құлаққа әсем тау суының жыры кеп,

Біз жарты күн ен жайлауда жүріп ек.

Енді қайта кездеспейді-ау деп едім,

Жолықтық-ау,   кіп-кішкене  құдірет.

Қалай   келдің?!

Қарай   бердім   сүйініп,

Жүрегіме кетті  нөсер құйылып.

Өр   өзеннің   иірімі   секілді

Таудай мені бара жатсың үйіріп.

Қайта оралып келген шаттық шағым-ау,

Арман  бұл  күн,

Деп жүр едім сағым-ау...

Бақыттан  ба,

Әсірелеу  ағаңның

Басы айналып бара жатыр, жаным-ау.

Үніңді де ұқтым бақыт үні деп,

Ет - жүректі елжіретті жылы леп.

Құдірет  бұл – махаббаттың  оты  ғой,

Сол  махаббат – сенсің, құйттай  құдірет!