Ақын өлеңдері жинағы ✍️

Ойым жоқ еді ұнасам деген,

Жігіті бар ма –

Сұрасам деп ем.

Жанарынан бір жалын ұшты да,

Көз қадастым мен құдашамменен.

Кірпіктеріміз қағылмай қалды,

Қос жанарымыз лағылдай жанды.

Телмірген маған мөп-мөлдір әлем

Көз емес, жанған жалынға айналды.

Қарайды күліп, қабағын керіп,

Өрт болды денем, барамын ба еріп?!

Жұтына бердім шөлде қалғандай,

Қараған сайын қарағым келіп.

Жұта бердім мен тұп-тұнық сырдан,

Жүрегім-тұлпар бұлқынып тұрған.

Алаулап мынау жанған жалынға

Болар ма екен ұмтылып құрбан?!

Ең, ең бақытты бұл күнім дедім,

Бір мұңайдым да, бір күлімдедім.

Дір-дір етті ғой кірпігі қыздың,

Дір-дір еткенде кірпігім менің.

Қос жанар неткен құдіретті еді,

Жазулы онда сыр жүректегі!

Дір-дір еткені кірпігіміздің –

Жүрегіміздің дір-дір еткені!