Ақын өлеңдері жинағы ✍️

Сенің күлкің әрі – нұр, әрі – бұлақ,

Есімді кіл алады бәріне ұнап.

Күлші!

Күлші!

Қайғыдан көзің жасы

Жанарыңнан барады тағы құлап.

Күлші!

Күлші!

Тежемей, анығырақ,

Бұл дүние болады жарығырақ.

Күлші!

Күлші!

Қарамай мұң-қайғыға,

Өксітті ғой өмірді бәрі жылап.

Сенің күлкің мөп-мөлдір, тұнық әрі,

Жылынады тыңдаған, құнығады.

Сенің күлкің – еркіндік, ерке құлын,

Жүген, ноқта,

Түспеген құрық әлі!

Тыңдап,

Жырлап күлкіңді жүрмін күнде,

Бір күлгенің татиды мың-мың гүлге!

Өтірік, өсек қаптаған бұл әлемде

Не жетеді шын жылап, шын күлгенге!

Домбыраның ішегі – сенің күлкің,

Күйім!

Әнім!

Сиқырлы көңіл кілтім!

Сенің күлкің алатын ажыратып

Жағама кеп жармасса өлім бір күн!