Ақын өлеңдері жинағы ✍️

Сүйесің! –

Сырыңды ақтардың,

Кетті ғой тау мен тас гүлдеп.

Шарықтап көкке шаттандым,

Аспаннан әрі асқым кеп.

Мақпал түн жаптым арқаңа,

Құлағыңа Айды сырға ғып.

Жанарыңда тұр алқа да

Ай-сырғаңменен нұрланып.

Аспаннан әрі астым мен,

Аралап кеттім құс жолын.

Жұлдыздан шашу шаштым мен,

Шық болып жерге түсті оным.

Сүйгенің мені үшін де

Әпердім бұлақ-шолпыңды.

Өңім бе әлде түсім бе?

Еске аласың ба сол түнді?!

Күшім де, ерек ісім де,

Әлі күн жүрмін таң қалып.

...Қараңғы ойларым ішінде

Сол бір түн ерек жап-жарық!