Ақын өлеңдері жинағы ✍️

Дүбірлі дәурен, көрікті көңіл, көк белдер,

Мөп-мөлдір аспан, көгілдір көлдер, көктемдер,

Арайлы таңым, айбатты асқар, ақ бұлақ,

Қажыған сәтім, қамыққан күнім жоқ деңдер.

Табиғат-Ана, тамылжып атқан таң күліп,

Көрген жоқ әлі әрлерің кетіп, әл құрып.

Әсерлі әндер, жазира жырлар, құдірет-Күн,

Тұруларың да,

Жылуларың да мәңгілік.

Орманды ойым, ынтызар жүрек, аптығым,

Жырларым, жаным, шабытты шағым, шаттығым,

Бала мінезім, аппақ арым мен пәктігім,

Асыл арманым,

Болмайды мүлде қарттығың!

Өмірге деген құштарлығымнан шығар-ау,

Толқиды тынбай кеудемде жанған мың алау.

Қартаймаймын мен!

Қартаяр болсам егер де

Қарттығым жалғыз түрімде ғана тұрар-ау...