Ақын өлеңдері жинағы ✍️

Ауылда талай үйлерде болып, шай іштім,

Орамал беріп, су құйып қолға майыстым.

Әкем жайында болатын кейде әңгіме

Жәшігін көрсе ел,

Пұшпағын көрсе қайыстың.

– Қиюластыра келтіріп қалай қашаған?

Сенің әкең ғой сандықты мынау жасаған...

Түсіріп еске жылайды қарттар кемсеңдеп,

Көңілім босап,

Көзіме мен де жас алам.

– Шанамды жөндеп, етігімді тіккен сол еді, –

Дейді де бәрі жиһазды барлап көреді.

Үңілем мен де ыстық қол табы жатқандай,

Үңілем қайта осы ғой деп оның өлеңі!