Ақын өлеңдері жинағы ✍️

Өмір жолын

Жаңа күн,

Кеше ғана бастап ем...

Күдікпенен қарадым,

Қырық деген жасқа мен.

Күмілжимін кейде енді,

Атсаң да сен күліп, Таң.

Кестелер ем жейдемді,

Сескенемін қырықтан.

Айтшы, Өмір – жан Ана,

Тұрмын себеп таба алмай:

Қырық деген балаңа

Үміттене қалардай.

Он сегізім, алданды,

Бақыт қой деп сәл күлсем.

Майдан дейсің жалғанды,

Қайдан келіп қалдың сен?!

Жиырма бесім жылады,

Отыз бесім ойланып.

Өткен күнім кінәлі –

Көктемімді қойды алып.

Тосырқадым (Тосқан кім?!)

«Өмір қалай өткен?» деп.

Әзілі не достардың?!

Әжіміңе өкпем көп!

Бір қияда тұр бағым,

Атойлаймын әлі мен.

Күліп кеткен жылдарым, –

Үмітті еткен бәрінен!

Әлі шыңға шығамыз,

Сәл қартайғым жоқ менің.

Кім үкімші, ұғамыз,

Қырықыншы көктемім!