Ақын өлеңдері жинағы ✍️

Купемізде сұлу қыз бар ай қабақ,

Поезд келед бір әуенді қайталап.

Жасымдағы нағыз өзім секілді

Қасымдағы сары жігіт сайтан-ақ.

Ал, біріміз шауқарғадай шал кісі,

Байқап келем, бойында әлі бар күші.

Мен қырықта қырма сақал көк тұқыл,

Көңіл шіркін, келмейд қыздан қалғысы.

Сұлылық-ай,  отырғам жоқ түңіліп,

Бүйірімді түртеді есер бір үміт.

Қызға қарап жұтынады кәрі шал,

Өңешінде жұтқыншағы жүгіріп.

Сезе ме, әлде сезбейді ме қыз мұны,

Қуанышы, болған жоқпыз біз мұңы.

Бірін-бірі аңдып бірге келеді

Бір купеде көктем, жаз, қыс, күз күні.

Поезд келед бір сөзді айтып жаршыдай:

«Арсыз көңіл»,

«Арсыз көңіл»,

«Арсыз-ай!..»