Ақын өлеңдері жинағы ✍️

Жел желігіп, жағаңнан ап жұлқымас,

Ыстық құмы,

Одан да ыстық ықылас.

Күн қызуын сіміріп ап,

Қатпайды

Ыстықкөлдің ыстықтығы ып-рас.

Үлкен – аға,

Боп кетеді кіші – іні,

Қырғыз – қазақ жатырқамас кісіні.

Айырмасы –

Қырғыздардың басында

Жүреді кіл Алатаудың мүсіні.

Күні де ыстық,

Ыстық құйған шайы да,

Бір-бір күн бар, қара сулы сайына!

Түні бойы көл бетінде тербелер

Қырғыз қалпақ киіп алып Айы да!

Біз егізбіз,

Достығымыз өнеге,

Табылады жезде, жиен, бөле де...

Алатаудың кіп-кішкене мүсінін

Мен де қайттым көтеріп ап төбеме!