Ақын өлеңдері жинағы ✍️

Шаттандырды шабытты шалқыды да ән,

Сен көріндің өнердің  әр қырынан.

Жыр   оқыдың,

Күй тарттың күмбірлетіп,

Сыр аңғартып көзіңнің жарқылынан.

Керемет  күй!

Кеткені-ай  тынышымның!

Өзің де әсем!

Қол соқпас бұл үшін кім?!

Алуан түрлі ардақты өнеріңдей

Алуан түрлі мен саған гүл ұсындым.

Сен салған ән – сұлу ән,

Жыр – ғаламат!

Жаным, тәнім, қанымды кірді аралап,

Балғын кейпің, бал жүзің – жанарымда,

Сол бір әуен,

Сол бір күй жүр мазалап.

Сенбейін бе, апыр-ау, сенейін бе,

Отырғандай бұлбұл құс көмейіңде.

Толтырғандай болдың сен әлемді әнмен,

Жүрегімде қалдырдым сол күйіңде.

Естімедім ондай үн еш жалғаннан,

Өнерге елтіп бәлкім бұл ес таңғаннан?!

Қайталанбас па екен-ай сен тартқан күй,

Көк аспанды көтеріп, сен салған ән?!