Ақын өлеңдері жинағы ✍️

Сезімнен құралдың,

Тұнған наз – үнің.

Даңқын шығардың

Құрманғазының.

Сен сыр ашқанда,

Жау беттемейді.

Көтердің аспанға

Дәулеткерейді.

Өмірді  көп көрдің,

Елімнің сүйгені –

Тәттімбеттердің

Тәтті күйлері!

Талмадың шабыстан,

Табынттың талайды.

Мыңменен алысқан,

Ойланттың Абайды.

Елімнің өр үні,

Талайды таң қылдың.

Түркештің көңілі,

Серігі Жамбылдың!

Тұрасың төрімде,

Өнердің тауысың.

Жеткіздің бүгінге

Дайрабай дауысын.

Домбырам – мол мұрам,

Жиғаны халықтың.

Күй болдың,

Болдың ән,

Динаны таныттың.

Сен бізді таныттың,

Біз сені таныттық.

Сүйгені халықтың,

Домбыра жарықтық!