Ақын өлеңдері жинағы ✍️

Екі-үш жылдай тамбай көк,

Жағасынан ну қашып,

Үйретілген тайдай боп

Қапты Торғай жуасып.

Толқынды да болмашы

Жатқандай ол қаламай.

Жылай- жылай көз жасы

Таусылған қарт анадай.

Жуасытып тастаған

Қиын- қыстау кезең бе?!

Шабан тарта бастаған

Не болды екен өзенге?!

Суын кәусар тереңнің,

Қайдан іздеп табармын?

Ырысы еді ол елдің,

Ағысына алаңмын...

Жан-тәніңді кезген мұң,

Сәттілігі қадамның -

Бастауында өзеннің,

Негізінде адамның!