Ақын өлеңдері жинағы ✍️

Нуға да бай,

Суға да бай,

Бурабай,

Қайталанбас ол ғажайып тумадай.

Күндіз Күні шомылса келіп көліне,

Алтын балық – шомылар түнде тулап Ай.

Осында жыр,

Осында сыр,

Күй деген,

Ақындықты,

Жарқындықты үйренем.

Көрдім мұнда көп қатарлы тастарды,

Көрдім мұнда қайыңдарды билеген.

Жап-жасыл көл,

Жап-жасыл бел,

Даланы-ай,

Күзетінде тұр қаздиып қарағай.

Оқжетпесі созып қолын аспанға,

Тәкаппар тұр, төменге көз сап қарамай.

Сұлу мекен, қалыпты сенде тұрақтап,

Құс аруы – айдында аққу жүр аппақ.

Асыл Арқа,

Ақындар шыққан арқалы,

Мен де өзіңнен кете алмай тұрмын жырақтап!